Sang Marso 7, 2025, nag-balos sa akon sulat si Atty. de Castro, ang administrador sang anay nga mayor sang syudad sang Victorias nga si Javier Benitez.
Ang isa sa guin-pangayo ko amo ang mga waiting shed para sa mga estudyante kag commuters nga naga-hulat sang masakyan nga Ceres, Cebro, van ukon taxi sa mga pakadto norte kag sur.
Hambal ko, dira sa Crossing Central duwa guid ka tarong nga waiting shed guid ang kinahanglan. Amo man ang waiting shed dira sa kilid City Health kag ang sa atubang plaza kinahanglan guid padakuon para kon naga-bôbô ang ulan kag naga-tagitî ang init, may pasilungan ang nga estudyante kag mga commuter.
Sang Enero 27, 2025, sa committee hearing sang Finance Committee sang Sangguniang Panlungsod sang Victorias, guin-panghambalan ko ang mga konsehal nga imbes sang mga labay-labay nga proyekto, unahon nila ang nga waiting shed kay kaluluoy guid ang nga estudyante kag mga commuters.
Naagyan guid naton ina nga sitwasyon kon naga-ulan kag kon sobra ang kainiton, kinahanglan guid may pasilungan. Maayo na ya sila nga mga opisyales guro kay nakasakay sa airconditioned nga mga salakyan nga ang gasolina kag ang suweldo sagn driver kita man gali naga-bayad kag naga-pasuweldo.
Sang ato nga committee hearing, nag-tambong man ang anay vice-mayor kag karon nga Mayor Abelardo Bantug III.
Ang akon guin-ekspektar nga komo nakabati guid ini siya sang hangyô ko nga mga waiting shed, matuman guid ang pagpatindog sini.
Ahay, bisan gali nakabatî siya sang akon wakal, daw wala guid galê sa iya bungog ang akon seryoso nga guin-pangayô.
Balik ta sa sulat sang anay administrador Atty. de Castro.
Ang hambal niya sa iya sulat (see attached photos) nga may Program of Works na kuno ang City Engineering Office para sa mga ini kag naka-istorya guid siya sa City Engineer parte sini.
Ti, hasta subong, Agosto 28, 2026, wala guid nag-tupâ ang iya hambal.
Kaga-ina, nag-bôbô ang ulan, gani guin-piktyuran ko guid ang waiting shed sa atubang plaza kon diin naga-ginutok ang mga kaluluoy nga estudyante.
Kon amo ni ang sitwasyon sa waiting shed sa atubangan plaza, ano pa guid ayhan ang sitwasyon sa may City Health kag Crossing Central?
Ang gwa sini, guin-intô lang ako kag guin-butigan sang anay city administrator sang anay mayor.
Sobra na isa ka tu-ig wala guid. Kon isipon ko, halin sang petsa sang iya sulat nga Marso 7, 2025, sobra na 17 ka bulan.
Sang Marso 2026, nag-gasto sila gani milyones sang aton nga kuwarta para sa Kadalag-an Festival bisan may krisis sa gasolina. Tapos, indi guid sila maka-gasto para sa mga waiting shed? Aton man ina kuwarta tanan!
Gani, kon ikaw guinikanan kag may estudyante nga naga-biyahe adlaw-adlaw pakadto sa norte ukon sur para mag-eskwela, indi ka mainit?
Tî, mga taga-Victorias, kay sin-o guid kita sini ayhan maka-pangayô tarong nga waiting shed? Maayo pa ang Silay. May banyo pa!
Kay wala guid kaluoy sa mga manugsakay ang nag-ligad nga mayor kag ang mayor naton subong nga ini sila kada Lunes may flag ceremony sa plaza, kit-anon guid ni sa ila tanan ang waiting shed kag ang mga manugsakay nga naga-tinompok dirâ.
Para sigurado, mangayô na lang kita waiting shed kay Governor Thirdy Marañon.
#disappointed #disappointedmuch #publicservant #Hiligaynon #essaywriting #essay #istoryakoto #istoryainaswang #publicservice #governance #waitingshed #commuter #pasahero #studentlife #VictoriasCity #NegrosOccidental #NegOcc #Philippines
